პრინცი ფილიპის  ბიოგრაფმა  ეშლი უოლტონმა მას დაარქვა „ჩვენი ეროვნული სიმდიდრე“. რას ნიშნავს  გაერთიანებული სამეფოსათვის ეს ხნიერი ჯენტლმენი, რომელმაც  66 წელი გაატარა დედოფლის გვერდით?

პრინცს ქვეყანაში მეტად თავისებური რეპუტაცია აქვს - ერთის  მხრივ   მოსავს პატივისცემა,  როგორც ეს მის სახელსა და ტიტულს შეეფერება, მეორეს მხრივ კი - იგი იმდენად გამოირჩევა უხეშობამდე მისული პირდაპირობითა  და ჯიქურ პირში მიხლილი სიტყვით, რომ ავიწყდებათ მახვილსიტყვაობისადმი მისი მიდრეკილება  და ზოგჯერ „gaffe“-ს -  უადგილო გამონათქვამებს აბრალებენ ხოლმე.

მისი გამონათქვამები საგანგებოდ დაბეჭდილ წიგნშიც კი არის შესული და მკითხველს შეუძლია წარმოდგენა შეიქმნას - რამდენად დროული იყო თუ უადგილო მის მიერ გამოთქმული ცალკეული შენიშვნები :

როდესაც ხელმძღვანელობდა ველური ბუნების ფონდს (1981 – 1996),  დაუპირისპირდა თანამედროვე ეკოლოგებს და მიახალა მათ: „ბუნების შენარჩუნებისათვის ზრუნვა არ ნიშნავს ბაჭიებთან ჩახუტებას“;

„ჩვენ დიდი პრობლემები გვაქვს ბიუჯეტთან დაკავშირებით. ეტყობა, დროა, დავანებო თავი პოლოს თამაშს“(1969);

პარაგვაიში გაენდო დიქტატორ ალფრედო სტრესნერს: „სასიამოვნოა სტუმრობა ქვეყანაში,  რომელიც მისი ხალხისაგან არ იმართება“ (1973)

ეკონომიკური რეცესიის შესახებ: „რამდენიმე წლის წინ ყველა ამბობდა, რომ საჭიროა მეტი გართობა, რომ ყველა მეტისმეტად ბევრს მუშაობს -  აი, ახლა ბევრს მიეცა გართობის საშუალება - ისინი კი ჩივიან უმუშევრობაზე. ჩანს, ხალხმა თვითონ არ იცის, რა უნდა (1981);

ნიგერიაში ყოფნისას ამ ქვეყნის პრეზიდენტს - ოლუსეგუნუ ობასანჯოს, რომელიც პიჟამის მაგვარ ეროვნულ სამოსში მიეგება, ჰკითხა: „თქვენ უკვე დასაწოლად ემზადებით?“

ჩინეთში ვიზიტის დროს იქ სასწავლებლად მყოფ ბრიტანელ სტუდენტებს უთხრა:“ აქ მეტისმეტად დიდხანს ნუ დაჰყოფთ, თორემ თვალები დაგიწვრილდებათ“ (1998);

„ახალგაზრდობა ყველგან ერთნაირია - გაუნათლებელია“ (2006);

გფრ-ს კანცლერ ჰელმუტ კოლს მიმართა: „ძვირფასო რაიხსაკნცლერო!“ (1997 – „რაიხსკანცლერის“ტიტულს ატარებდა ჰიტლერი);

„ბევრი ფიქრობს, რომ ჩვენთან გამეფებულია მკაცრი კლასობრივი სისტემა, მაგრამ ყოფილა, რომ ჰერცოგები გუნდის მომღერლებზე დაქორწინებულან, ზოგიერთები ამერიკელებზეც კი ქორწინდებიან”(2000).