უკრაინელმა ფეხბურთის ფანატიკოსებმა თავიანთ ინტერნეტ-გვერდზე გამოაქვეყნეს განცხადება, სადაც 18 წელზე მეტი ხნის ფეხბურთის ყველა ფანატიკოსს და დედაქალაქის რიგით მცხოვრებთ მოუწოდეს, გამოვიდნენ ქუჩებში საკუთარი დედაქალაქის დასაცავად! ”გუშინ ღამით - წერია განცხადებაში - მოქმედი ხელისუფლების დაქირავებულმა ”ხელის ბიჭებმა” ქუჩებში გამოიყვანეს ერის გამყიდველი ”ტიტუშკები”, რომელთა მიზანიც იყო ”მოქალაქე იანუკოვიჩის” რეჟიმის მოწინააღმდეგე ადამიანების ცემა, მათი მანქანების მსხვრევა და ქალაქისათვის ზიანის მიყენება. ის, რომ მილიცია იცავს საზოგადოებრივ დაწესებულებებს - ერთია. მაგრამ ის, რომ უკრაინის დედაქალაქში, დიად კიევში ღამით დაიარებიან დაქირავებულ ნაძირალათა ბანდები - ეს სულ სხვა რამ გახლავთ.” ფეხბურთის ფანატები მოუწოდებენ თანამემამულეებს: შეკრიბონ თავდაცვითი ეკიპაჟები ავტომობილებში, მოახდინონ ურთიერთკოორდინაცია, იქონიონ თან თავდაცვითი საშუალებანი, მოუხმონ მეგობრებსა და ახლობლებს. ”აუხსენით, რომ ჩვენ გამოვდივართ არა იმისათვის, რათა მიგვიღონ ევროკავშირში, არა იულიასათვის, ვიტალისათვის, არსენისა და ოლეგისათვის, არა რუსეთისა და რუსების წინააღმდეგ! ჩვენ გამოვდივართ კიევისათვის, ჩვენი ქალაქისათვის, ჩვენი ქვეყნისათვის, ჩვენი ღირსების დასაცავად! დამთავრდა ხუმრობა: კიევი დაიცავს საკუთარ სიცოცხლეს!” - ხაზგასმით არის ნათქვამი განცხადებაში. კიევის ფეხბურთის ფანატთა მთავარი ულტრა დაჯგუფება ”WBC” – იძლევა დაპირებას, რომ ფანატთა ყველა ავტომობილი, რომელიც მიიღებს დაზიანებას ღამის მორიგეობის დროს, გარემონტდება დაჯგუფების საერთო ანგარიშიდან. |
