თავადი დიმიტრი ჯორჯაძე იყო ტიტულარული მრჩევლის, ალექსანდრე ჯორჯაძის ვაჟი. საქართველოში ბოლშევიკური დიქტატურის დამყარების შემდეგ, დამპყრობელთან შეურიგებელი თავადი ემიგრაციაში წავიდა და ცნობილი ავტომრბოლელი გახდა.

 1931 წელს, იტალიელ გოფრედო ძეჰენდერთან ერთად მერსედეს–ბენცით მოიგო 24–საათიანი რბოლა „სპა“ ბელგიაში და დიდი პრიზი დაისაკუთრა. მან დაძლია ყველაზე ვრცელი დისტანცია 1 580.7 მილი საათში 65.8 მილი სიჩქარით.

იგი ორჯერ იყო დაქორწინებული. მისი პირველი ცოლი იყო ოდრი ემერი – თავად დიმიტრი პავლეს–ძე რომანოვის ყოფილი მეუღლე. მან აღზარდა ოდრი ემერისა და დიმიტრი რომანოვის ვაჟი პავლე. განქორწინების შემდეგ, 1954 წელს შეირთო მსახიობი სილვია ეშლი, რომელიც მანამდე ცნობილი დიდგვაროვნების – ლორდ ეშლი კუპერის  (Anthony Ashley-Cooper, Lord Ashley) და ედვარდ ჯონ სტენლის, აგრეთვე კინოვარსკვლავების –  დუგლას ფერბენქსის და კლარკ გეიბლის ნაცოლარი იყო.

აშშ–ში დიმიტრი ჯორჯაძემ შეიძინა  „ბუნ ჰოლის“ სახელით ცნობილი ისტორიული ღირებულების მქონე პლანტაცია სამხრეთ კაროლინაში. მოეკიდა სასტუმროების ბიზნესსა და საცხენოსნო შეჯიბრებებს. მის საუკეთესო მერანს ერქვა Princequillo, რომელიც 1943 წელს ყველაზე სწრაფი ცხენი იყო გრძელ დისტანციებზე, შეერთებულ შტატებში.

სურათზე: კალიფორნია 1955 წელი, მეუღლესთან ერთად, კოსტუმირებულ მიღებაზე, ინდოელი მაჰარაჯას კოსტიუმში...