მოსკოვის საპატრიარქოს ეკლესიისა და საზოგადოების ურთიერთობის განყოფილების თავმჯდომარე, დეკანოზი ვსევოლოდ ჩაპლინი დააჯილდოვეს. რუსეთის საიმპერატორო სახლის  და მისი საიმპერატორო უმაღლესობის, მარია ვლადიმიროვნას დადგენილებით დეკანოზ ვსევოლოდ ჩაპლინს მიეკუთვნა  წმიდა მთავარ ვლადიმირის IV ხარისხის  საიმპერატორო ორდენი.

„РИА "Новости"-სთან საუბარში  მადლიერმა მღვდელმსახურმა არ გამორიცხა რუსეთში მონარქიის აღდგენის შესაძლებლობა. თუმცა ამისთვის წინაპირობად დაასახელა ქვეყანაში აუცილებელი წანამძღვრების არსებობა, რადგან, მისი სიტყვით,  ამ სახის მმართველობის ხელოვნურად დანერგვას შეუძლია ქვეყანაში ნეგატიური შედეგების მოტანა. 

„მე შევეწინააღმდეგებოდი მონარქიის ხელოვნურად დანერგვას საზოგადოების მოუმზადებლად. ასეთი აღორძინება იქნებოდა კარიკატურული, რითაც გაუფასურდებოდა და დაკნინდებოდა მონარქისტული იდეა“, - აცხადებს მღვდელმსახური - „არსებობს რუსეთის გარეთ არსებულ ძალთაგან ზოგიერთი იმდაგვარი პოლიტექნოლოგიური სცენარები, რომლებიც გულისხმობენ საზღვარგარეთიდან მართული მონარქიის დამყარებას - როგორც რუსეთის ამ კონტროლისადმი  დაქვემდებარების ერთ-ერთ ვარიანტს. ვშიშობ, რომ ასეთ „აღორძინებას“ არ მიიღებს ჩვენი ხალხი და ისიც საეჭვოა, რომ  ამან სარგებლობა მოუტანოს რუსეთს“.