კემბრიჯის ჰერცოგინია იმშობიარებს პადინგტონის სენტ-მერის საავადმყოფოს კერძო განყოფილებაში. ამ კლინიკაში თავის დროზე უმშობიარებია პრინცესა დიანას. ბავშვის მოვლინებას მშობლები ელიან ივლისის შუა რიცხვებში. მანამდე უილიამს და ქეითს არ ეცოდინებათ თავიანთი შვილის სქესი. მეუღლეებმა გადაწყვიტეს საკუთარ თავს სიურპრიზი მოუწყონ. მიუხედავად იმისა, რომ პატარის დაბადება პირველ რიგში ერთი კონკრეტული ოჯახის სიხარულია, მთელი ბრიტანეთი უილიამთან და ქეითთან ერთად სულმოუთქმელად ელის ამ დღეს. სამეფო სახლის წარმომადგენლებმა საგანგებოდ მიმართეს პრესის ორგანოებს და სთხოვენ ამ დარგის ყველა მუშაკს მაქსიმალური დელიკატურობის გამოჩენას. ისინი შეახსენებენ საინფორმაციო ორგანოებს იმ ტრაგედიას, რომელიც მოჰყვა ორი ავსტრალიელი ჟურნალისტის უბოროტო ხუმრობას: ტოქსიკოზით საავადმყოფოში მოხვედრილი ქეითის შესახებ სასურველი ცნობების შეკრებისას, მათ ექთანს - ჰასინტა სალდანას თავი სამეფო სახლის წარმომადგენლებად წარუდგინეს. ექთანმა გულახდილად გაანდო მათ ფეხმძიმე ქალის ჯანმრთელობის მდგომარეობა, ხოლო, როდესაც გაარკვია, რომ ჟურნალისტებისგან იყო გათამაშებული, თავი მოიკლა. | 
