ელისაბედ II-ის როლის შესრულებისთვის  „ოსკარის“ მფლობელმა ჰელენ მირენმა კიდევ ერთხელ მოირგო დედოფლის გრიმი, რათა ლეიკემიით დაავადებული მომაკვდავი ბავშვის ოცნება აესრულებინა.

10 წლის ბრიტანელ ოლივერ ბერტონს ბუკინგემის სასახლეში სტუმრობისა და დედოფლის გაცნობის ძალიან დიდი სურვილი ჰქონდა. თვით ელისაბედ  II-ეს არ მოუხერხდა ბავშვთან შეხვედრა, მაგრამ პატარის სურვილის ასრულება  მოახერხა 67 წლის ჰელენ მირენმა, რომელიც ამჟამად დაკავებულია სპექტაკლ „აუდიენციაში“, სადაც ის დედოფლის როლს თამაშობს. მან ოლივერის დედასა და თვით ბავშვს გაუგზავნა მოსაწვევი თავის სპექტაკლზე, ხოლო შემდეგ ისინი კულისებში  ჩაიზე დაპატიჟა.

მირენმა პატარა ოლივერი რაინდად აკურთხა, როდესაც ის მასთან საგრიმიოროში შევიდა. მშობლები ძალან ბედნიერები იყვნენ, რაკი ბავშვმა დაიჯერა, რომ დედოფალთან იმყოფებოდა.

ოლივერს ლეიკემიის დიაგნოზი სამი წლის ასაკში დაუსვეს. შვიდი წელი ებრძოდნენ მშობლები მის სენს. მაგრამ გასულ თვეში ექიმებმა მათ უკანასკნელი იმედიც წაართვეს და ამცნეს, რომ ბავშვს    სულ რამდენიმე თვის ან კვირის სიცოცხლე დარჩა. ოლივერს ლეიკემიასთან  ერთად დაუნის სინდრომიც აქვს,  რაც მას მგრძნობიარეს ხდის  სხვადასხვა პრეპარატების მიმართ. მშობლები ცდილობენ ცხოვრების უკანასკნელი დღეები ბედნიერი სიამოვნების მომტანი ემოციებითა და შთაბეჭდილებებით აუვსონ ბავშვს.