ეიფორია, რომელიც სუფევს დიდ ბრიტანეთში და შორს მის ფარგლებს გარეთ ქეთრინისა და პრინც უილიამის პირმშოს მოლოდინში, პირველი ასეთი შემთხვევა არ არის ისტორიაში. სამაგალითოდ კმარა თვით უილიამის დაბადების გახსენება - 1982 წლის 21 ივნისს ასობით ადამიანი ელოდა მოუთმენლად წმიდა მარიამის საავადმყოფოსთან ქვეყანაზე მის მოვლინებას და თვით თავსხმა წვიმას არ შეუშლია ხელი იმ საზეიმო ატმოსფეროსთვის, რომელიც მაშინ სუფევდა.

სამეფოს ქვეშევრდომნი, რომლებიც ამ დღეს საზღვარგარეთ აღმოჩნდნენ - ავიახაზების ბორტზე მყოფნი აღნიშნავდნენ ახლი მონარქის დაბადებას - პირდაპირ თვითმფრინავებში   სწევდნენ ჭიქას, რომელშიც სპეციალურად მომზადებული სასმელი იყო - ”Royal Birth Celebration Cocktail”.

საუკუნეებით დამკვიდრებული ტრადიციით (რომელიც ამჟამადაც, ცხადია, დაცული იქნება) უწყება პირმშოს დაბადების შესახებ იკვრება ბუკინგემის სასახლის ჭიშკარზე, რასაც   მთელ ქვეყანაში მოჰყვება სალუტი. და თუ პრინც უილიამის სახელი საქვეყნოდ გამხელილ იქნა ერთი კვირის შემდეგ დაბადებიდან, დღევანდელი საინფორმაციო ტექნოლოგიებისა და სოციალური ქსელების პირობებში უილიამის შვილის სახელს ალბათ პირველივე წუთებში თუ არა, პირველივე საათებში  გაიგებს მთელი მსოფლიო.