ჩვენი საიტი უკვე იუწყებოდა ქეით  მიდლტონის განცხადების თაობაზე,  რომ  ბავშვის პირველ სურათებს, რომლებიც გამოქვეყნდებოდა დამდეგ კვირას,  გადაიღებდა არა პროფესიონალი ფოტოგრაფი, არამედ - თვითონ:

”თავის დროზე ქეითი გატაცებული იყო ფოტოგრაფიით და იღებდა სურათებს მშობლების საიტისათვის. ასე რომ,  ის კარგად არის დაუფლებული  ფოტოგადაღების ტექნიკას. ამავე დროს, ჰერცოგინიას განმარტებით, ასეთი ფოტოები გამოვა უფრო ბუნებრივი, რადგან პატარა ჯორჯი იქნება მისთვის ჩვეულ გარემოში. საერთოდაც - ქეითი ხაზგასმით აღნიშნავს, რომ სურს ვაჟიშვილის აღზრდა საკუთარი პრინციპებით და არამარტო ტახტის მემკვიდრის  აღზრდის აქამდე მიღებული წეს-ჩვეულებით”, - ასეთი იყო წინა ინფორმაცია.  

უკანასკნელი ცნობებით, კემბრიჯის ჰერცოგები მართლაც გაასაჯაროებენ დედის მიერ გადაღებულ შინაურ ფოტოებს. მაგრამ, როგორც ბუკინგემის სასახლის ”Twitter”-ბლოგი  გვამცნობს, შინაურ  კადრებთან ერთად, სადაც აღბეჭდილნი იქნებიან ბავშვიცა და მისი დედ-მამაც, გამოქვეყნდება პროფესიონალი ფოტოგრაფების გადაღებული სურათებიც.

სურათების მრავალფეროვნების ზრდას ვარაუდობენ უახლოეს მომავალში, როდესაც პატარა უფლისწული მშობლებთან ერთად გაემგზავრება თავის პირველ საზღვარგარეთულ ტურნეში - ახალ ზელანდიასა და ავსტრალიაში.

დღეს  უკვე გამოჩნდა ინტერნეტში პრინცის ახალი ფოტო, რომელიც ქეითის მამის მიერ არის გადაღებული.