ინგლისის დერბიშირის საგრაფოში, ანსონს-ის აუქციონზე ხუთშაბათს 230 ფუნტ სტერლინგად გაიყიდა შემწვარი პურის ნაჭერი, რომელიც საქორწინო საუზმეზე მიართვეს პრინც ჩარლზს.

ეს იყო პრინცესა დიანასთან ქორწილის დღეს - 30 წლის წინათ.

როგორც სააუქციონო სახლის პრეს-სამსახური იუწყება, პურის ნაჭერი ინახებოდა 1981 წლის 29 ივლისიდან ბუკინგემის სასახლის  იმ მოახლის ოჯახში, ვინც ქორწილის დღეს მიართვა საუზმე პრინცს.

პურის ნაჭერი სუვენირის სახით წამოიღო მოახლის 83 წლის დედამ როზმარი სმიტმა. იმ დღეს ის ქალიშვილს სტუმრობდა და დერეფანში იდგა, როდესაც მას ლანგარი გამოჰქონდა პრინცის საძინებლიდან.

თეფშზე მან დაინახა  შეუჭმელი გახუხული პური და წამოიღო ამ დღის მოსაგონებლად. პური დღემდე კარგად იყო შენახული, ჯერ ერთი, იმიტომ, რომ ვერ მოასწრეს მასზე რაიმეს წასმა, ხოლო   მეორეს მხრივ -  შეწვის შემდეგ მას ტენის ნასახიც აღარ შერჩა.

სხვათა შორის, შემოსული თანხა იმაზე ნაკლები აღმოჩნდა, ვიდრე აუქციონის მესვეურები ვარაუდობდნენ  (სულ მცირე 500 ფუნტს). თუმცა გაყიდვის შემდეგ დარბაზში მაინც  გაისმა მქუხარე აპლოდისმენტები.