|
ბელგიელმა პროფესორმა შეისწავლა ევროპული მონარქიების საბიუჯეტო ხარჯები
„ევროპულ მონარქიათა საბიუჯეტო ღირებულებანი“
ბელგიის სახელმწიფო მმართველობისა და ფინანსების პროფესორმა ჰერმან მატისმა საზოგადოებას წარუდგინა მოხსენება თემაზე: „ევროპულ მონარქიათა საბიუჯეტო ღირებულებანი“. გასული წლის მონაცემების მიხედვით მან გააანალიზა 8 მონარქიული ქვეყნის - ლუქსემბურგის, ნორვეგიის, დანიის, ნიდერლანდების, ბელგიის, შვედეთის, დიდი ბრიტანეთის და ესპანეთის მდგომარეობა.
თუ მონარქიებს დოტაციის მიხედვით შევადარებთ ერთმანეთს, გამოდის, რომ სხვაზე მეტს საკუთარ პორფიროსნებზე ხარჯავენ ბრიტანეთში - 45,6 მილიონ ევროს წელიწადში. სხვა სიტყვებით რომ ვთქვათ, 60 მილიონი მოსახლეობის ქვეყანაში ყოველი ბრიტანელი დიდი ბრიტანეთის მთავარი სიმბოლოსათვის 1 ევროზე ნაკლებს ხარჯავს წელიწადში.
ნიდერლანდებში ეს დანახარჯები შეადგენს 39,1 მილიონ ევროს წელიწადში, ნორვეგიაში - 25,1მილიონ ევროს; ბოლო ადგილზეა ესპანეთის სამეფო ოჯახი - სულ 8,4 მილიონი ევრო.
შედარებისათვის შეიძლება ითქვას, რომ საფრანგეთის ხელისუფალნი დოტაციის სახით ბიუჯეტიდან იღებენ 112 მილიონ ევროს, ხოლო გერმანიისა - 28 ,7 მილიონ ევროს.
რაც შეეხება შემოსავლებს - ყველაზე მაღალი წლიური შემოსავალი აღმოაჩნდა ნორვეგიის მეფეს - ჰარალდ V-ეს. ყველა გადასახადის გამოკლებით მის წილად მოდის 1,2 მილიონი ევრო. სამეულში შედიან ნიდერლანდების დედოფალი ბეატრიქსი - 829 ათასი ევრო და ლუქსემბურგის დიდი ჰერცოგი ანრი - 645 ათასი ევრო. ესპანეთის მეფე ხუან კარლოსი ამ სიაშიც ბოლო ადგილზეა - 175 622 ევრო.
შედარებისათვის - გერმანიის პრეზიდენტი იღებს 277 ათას ევროს, ხოლო საფრანგეთის პრეზიდენტი - 273 ათას ევროს. |
|
