ლუქსემბურგის პრინცის,  გიიომისა და გრაფინია სტეფანია დე ლანუას საქორწინო დღესასწაული  ორი დღის მანძილზე გრძელდებოდა ლუქსემბურგში.  ჯვრისწერის ცერემონია გაიმართა შაბათ დილას ლუქსემბურგის ღვთისმშობლის ტაძარში. მანამდე 30 წლის გიიომი უკანასკნელი უქორწინო მემკვიდრე პრინცი იყო ევროპაში.

გრაფინია სტეფანია დე ლანუა დაიბადა 1984 წელს აღმოსავლეთ ფლანდრიაში, უძველეს არისტოკრატულ ოჯახში. მან უმაღლესი განათლება მიიღო ლიოვენის კათოლიკურ უნივერსიტეტში. ახლად დაქორწინებულთ დიდი ხნის ნაცნობობა აკავშირებთ. 2009 წლიდან ხვდებიან ერთმანეთს, ხოლო 2011 წელს დაინიშნენ.

სამეფო ქორწილმა მიიპყრო საინფორმაციო საშუალებათა და ტურისტების დიდი ყურადღება, რომლებიც ყიდულობდნენ სუვენირებს ნეფე-პატარძლის  გამოსახულებით და ამ დღესასწაულთან დაკავშირებით გამოშვებულ შამპანურსა და შოკოლადს.  ცერემონია საჰერცოგოს დაუჯდა დაახლოებით 350 ათასი ევრო.

როგორც ადგილობრივმა ბიზნესმენმა ფერნანდ კლიიმ აღნიშნა: „ქორწილი - ეს ყოველთვის განსაკუთრებული მოვლენაა. ვიმედოვნებ, რომ საქორწინო დღესასწაული ყველას დაანახებს, რომ ლუქსემბურგი არა მარტო თავისი ბანკებით არის ღირსშესანიშნავი  -  ეს არის უძველესი ნაგებობებით დამშვენებული, საუკეთესო საკვებითა და ზვრებით განთქმული  ულამაზესი ქვეყანა“.