განცხადება პრეზიდენტის მკვლელობის გამოძიებასთან დაკავშირებით როგორც ცნობილია, ა. წ. 31 დეკემბერს იწურება პრეზიდენტ ზვიად გამსახურდიას მკვლელობის საქმის ხანდაზმულობის ვადა და მას დახურავენ. პროკურატურაში მრავალგზის უშედეგო შეხვედრების შემდეგ, 14 დეკემბრიდან კონსტანტინე და ცოტნე გამსახურდიები ამას შიმშილობის აქციით აპროტესტებენ. ჩვენს გულისწყრომას იწვევს უყურადღებობა არა მხოლოდ პროკურატურის, არამედ საქართველოს პარლამენტის ადამიანის უფლებათა დაცვის კომიტეტის მხრიდანაც. ჩვენდა გასაკვირად, მოშიმშილეები არ მოუნახულებია, არც სახალხო დამცველის აპარატის არც ჯანდაცვის სამინისტროს წარმომადგენლებს, არც საქართველოში არსებულ ადამიანის უფლებების დამცველ არასამთავრობო ორგანიზაციებს. მაშინ, როდესაც საქართველომ განვითარებისთვის მიზნად დაისახა ევროპულ სივრცეზე ორიენტირება, ეს ასევე მკვეთრად უნდა აისახოს ადამიანის უფლებებისა და დემოკრატიის პრინციპების დაცვის მიმართულებითაც. არადა, საქართველოში პირველი მრავალპარტიული დემოკრატიული არჩევნებით გამარჯვებული პრეზიდენტის მკვლელობა დღემდე გამოუძიებელია. საქართველოს სამეფო კლუბი სოლიდარობას უცხადებს კონსტანტინე და ცოტნე გამსახურდიებს და მოუწოდებს მთავარ პროკურატურას, არ დახუროს პრეზიდენტ ზვიად გამსახურდიას მკვლელობის საქმეზე გამოძიება.
| 
