უელსის პრინცის, ჩარლზის და მისი მეუღლის - კორნუოლის ჰერცოგინია კამილას ოფიციალურ საიტზე გაჩნდა ახალი განყოფილება, სადაც პასუხებია გაცემული ყველაზე ხშირ კითხვებზე და გაქარწყლებულია მითები პრინცსა და მის მეუღლეზე.

სულ განყოფილებაში 26 სექციაა, საიდანაც შეიძლება გაგება - რა შეძლების პატრონია პრინცი, გახდება თუ არა კამილა დედოფალი, ან  რას მიირთმევს პრინცი საუზმეზე.

ზოგიერთი მითი იმდენად მტკიცედ არის გამჯდარი ობივატელის შეგნებაში, რომ ქილიკის საგნადაც კი ქცეულა. ერთი მათგანი, მაგალითად, გაჩნდა მას შემდეგ, რაც 2006 წელს გამოქვეყნდა ჯერემი პეკსმენის წიგნი, სადაც ავტორი ირწმუნებოდა, რომ ჩარლზი მსახურს აიძულებს ყოველდღიურ საუზმეზე მოუხარშოს შვიდი კვერცხი, რომელთაგან ირჩევს მხოლოდ ერთს. საიტზე ეს ინფორმაცია უარყოფილია.

ცალკე განყოფილება ეთმობა ჩარლზის პერსპექტივებს სამეფო ტახტის დაკავებასთან დაკავშირებით. მათ შორის მუსირებს საკითხიც, მართალია თუ არა, რომ გვირგვინის დდგმის ცერემონია ჩატარდება არა ანგლიკანური, არამედ მულტიკონფესიონალური ტრადიციის მიხედვით.  სამეფო კარი ყველა მსგავს კითხვაზე ცალსახად პასუხობს, რომ ჩარლზი არ განიხილავს ამ თემას, ვიდრე ტახტზე იმყოფება მისი დედა.

საიტზე ასევე უარყოფილია ჭორები, თითქოს ჩარლზი თანამედროვე არქიტექტურის წინააღმდეგი იყოს. ეს ჭორი აგორდა მას შემდეგ, რაც მან ლონდონის ისტორიულ რაიონებში  ახალი ნაგებობების აშენების წინააღმდეგ გაილაშქრა. სინამდვილეში სამეფო კარის არქიტექტურა სრულიად საპირისპიროს მეტყველებს. ამას გარდა, ჩარლზი მეურვეობდა თანამედროვე არქიტექტურის განვითარებისათვის წარმართულ რამდენიმე საქველმოქმედო კამპანიას.

კიდევ ერთი პოპულარული მითი - თითქოს პრინცის მფლობელობაში იყოს  პირადი Bentley. სინამდვილეში ეს ავტომობილი ეკუთვნის ლონდონის პოლიციას. ჩარლზი მას იყენებს მხოლოდ ოფიციალური ღონისძიებებისათვის.

საიტზე იმის გარკვევაც შეიძლება, რომ პრინცი და მისი შვილები ცხოვრობენ კორნუოლის საჰერცოგოს შემოსავლებით. ჩარლზი იხდის ამ შემოსავლებიდან 50%-ს გადასახადების სახით, მაგრამ არ იხდის  კორპორაციულ გადასახადს, რამდენადაც ფერმა და მთელი წარმოება საჰერცოგოში დარეგისტრირებულია, როგორც ტრასტი.

მითების უარყოფა კამილას წილადაც მოდის - იმ  მოარული ხმების პასუხად, რომ კამილა ეწევა, საიტზე წერია, რომ მან მრავალი წლის წინ დაანება ამ მავნე ჩვევას თავი.