სამშაბათს დედოფალი ელისაბედ II ტახტზე ასვლის შემდეგ პირველად დაესწრო მინისტრთა კაბინეტის სხდომას.

დედოფალი ელისაბედ II ესწრებოდა სხდომის მხოლოდ ნაწილს. ის მცირე ხნით ბრძანდებოდა პრემიერ კემერონის სავარძელში:   მარჯვნივ პრემიერის და მარცხნივ - საგარეო საქმეთა მინისტრ უილიამ ჰეიგის გარემოცვაში.

დედოფალმა ჰეიგთან ერთად დატოვა სხდომა და გაემართა საგარეო საქმეთა სამინისტროსაკენ, სადაც მას ელოდა სიურპრიზი. დედოფალს ამცნეს, რომ მისი სახელი დაერქვა ანტარქტიკის ნაწილს.

ამიერიდან ბრიტანეთის ანტარქტიკული ტერიტორიის სამხრეთის რაიონი იწოდება დედოფალ ელისაბედის მიწად.

„ეს არის ჩვენი მხრიდან პატივის მიგება, რითაც სრულდება წელიწადი, რომელმაც ჩაიარა ბრილიანტის იუბილის ეგიდით. მე ამაყი ვარ, რომ შემიძლია ეს განვაცხადო დედოფლის ვიზიტის ჟამს საგარეო საქმეთა სამინისტროში“ - განაცხადა ბრიტანეთის საგარეო საქმეთა მინისტრმა უილიამ ჰეიგმა.

ბრიტანეთის ანტარქტიკული ტერიტორია, რომელიც მისი უდიდებულესობის მფლობელობაშია, სიდიდით რამდენიმეჯერ აღემატება გაერთიანებულ სამეფოს.