ნიდერლანდების დედოფალმა ბეატრიქსმა საკუთარი ვაჟის ვილემ-ალექსანდრეს სასარებლოდ ტახტიდან გადადგომის შესახებ გამოაცხადა.

ხალხისადმი მიმართვაში დედოფალმა განაცხადა, რომ მისი ვაჟი მეფე 30 აპრილს გახდება. ბეატრიქსი, რომელსაც მალე 75 წელი შეუსრულდება, ნიდერლანდების დედოფალი 1980 წელს გახდა. დედოფლის თქმით, ტახტიდან გადადგომაზე რამდენიმე წელიწადია ფიქრობდა. მისი თქმით, ” ახალი თაობის დრო მოვიდა.” დედოფალმა დაამატა, რომ მისი ვაჟი მეფედ გახდომისათვის მზად არის.

პრინცი ვილემ-ალექსანდრე 45 წლის არის, მას მეუღლე და სამი ბავშვი ჰყავს. ვილემ მესამეს შემდეგ ის პირველი მამაკაცი იქნება, რომელიც ნიდერლანდების სამეფო ტახტზე ავა. 1890 წლიდან მოყოლებული ეს ადგილი დედოფლებს ეკავათ.