ბრიტანეთის დედოფალმა ელისაბედ II -მ თავად გამოთქვა სურვილი ოლიმპიადის დაწყებისათვის გადაღებულ ფილმში ჯეიმს ბონდის „თანამეწყვილის“ როლში ყოფილიყო.

დამდგმელი რეჟისორის, დენი ბოილის განმარტებით, დედოფლის როლს იგი სთავაზობდა მსახიობ ჰელენ მირენს, რომელსაც მიღებული აქვს „ოსკარის“ პრემია ელისაბედ II-ის როლის  თამაშისათვის ფილმ „დედოფალში“. ნამდვილი დედოფლის ფილმში გადაღება ბოილს თავში არც მოსვლია. მას შემდეგ, რაც ამ მოკლე საეკრანო დადგმის იდეის ავტორებმა ბუკინგემის სასახლეში წარგზავნეს თავიანთი სცენარი დასამტკიცებლად, მოულოდნელად ელისაბედ II-მ განაცხადა, რომ თავად სურს საკუთარ როლში ყოფნა. 

სიუჟეტის მიხედვით ჯეიმს ბონდს იძახებენ აუდიენციაზე ბუკინგემის სასახლეში დედოფალთან. როდესაც ბონდი შედის, დედოფალი თავიდან ვერ ამჩნევს მას, რადგან მთელი ყურადღებით კითხულობს  მაგიდაზე დახვავებულ ქაღალდებს. ჯეიმს ბონდი მორიდებით ახველებს, ყურადღების მისაქცევად. დედოფალი მიუბრუნდება და ეტყვის: „საღამო მშვიდობისა, მისტერ ბონდ“.

შემდეგ ელისაბედ II და ჯეიმს ბონდი ვერტმფრენით მიემგზავრებიან ოლიმპიური სტადიონისკენ დედაქალაქის სტრატფორდის რაიონში. ისინი გადაუფრენენ ლონდონს. ქვემოდან მათ ესალმებიან გამვლელები, ლონდონის ტაქსი-კების მძღოლი და თვით ბრიტანეთის პრემიერ უინსტონ ჩერჩილის ბრინჯაოს ქანდაკება. ფილმის ბოლოს ვერტმფრენი დაეკიდება სტადიონის თავზე, რის შემდეგაც დედოფალი და ჯეიმს ბონდი პარაშუტებით „დესანტირდებიან“ ოლიმპიურ არენაზე.