| დღეს, 29 აპრილს არის ხსენება წმიდა ირინესი. ცნობილია, რომ წმიდა მოწამე ქრისტესათვის ევნო აღდგომის დღესასწაულზე. წმინდანი ცხოვრობდა საბერძნეთში, III საუკუნეში. მრავალ სხვა ქრისტიანთან ერთად ის ბინადრობდა ერთ გამოქვაბულში. ქრისტესმოსავნი მთელ დროს გამუდმებულ ლოვცვაში ატარებდნენ. უკეთურმა კერპთაყვანისმცემლებმა ის დააბეზღეს მმართველთან. მმართველის ბრძანებით წმიდა ირინე შეიპყრეს და ბორკილდადებული სატუსაღოში გამოამწყვდიეს. როდესაც მმართველის წინაშე წარადგინეს, წმიდა ირინემ მხნედ აღიარა ქრისტე ჭეშმარიტ ღმერთად, ყოველივე ამქვეყნიურის შემოქმედად, მაცხოვნებლად, ადამიანთა გამომხსნელად და კერპთა შემმუსრავად. ამის გამო ის სასტიკად ჰგვემეს და ისევ სატუსაღოში დააბრუნეს. მმართველმა ქალაქის მცხოვრებთა საქმეების განხილვას მიჰყო ხელი და როცა მოიცალა, ისევ მოაყვანინა წმიდა ირინე. კვლავ დაუწყო ქრისტეს უარყოფის მოთხოვნა და, როცა ისევ უარი მიიღო, ჯალათებს გადაულოცა საწამებლად, რომლებმაც ჯერ ენა ამოაგლიჯეს, შემდეგ კბილები ჩაუმტვრიეს და ბოლოს მახვილით მოჰკვეთეს თავი. |
