წმიდა მარინის წამება აღესრულა რომის იმპერატურ კარინუსის (283-285) დროს. წმიდა მარინი წარჩინებული ოჯახის შვილი იყო. ის ქრისტესადმი ერთგულების ბეზღებით დაატუსაღეს და აიძულებდნენ წარმართული კერპებისათვის მსხვერპლის შეწირვას, მაგრამ ყმაწვილმა ზრდასრული მამაკაცის თავდაჯერებულობით განაცხადა უარი ქრისტეს უარყოფაზე და მტკიცედ დადგა ყველა სატანჯველის წინაშე: თავდაპირველად ის ჩამოჰკიდეს ძელთან და სასტიკად როზგავდნენ, შემდეგ გავარვარებულ ცხაურზე დააწვინეს და ბოლოს ადუღებულ წყალში ჩააგდეს. როდესაც დაინახეს, რომ სულიწმინდის ძალით მოგიზგიზე ცეცხლი გრილ ნამად ექცა, და არავითარ ზიანს არ აყენებდა, ის დასაგლეჯად მიუგდეს გარეულ მხეცებს. იგი მხეცებსაც იოლად გადაურჩა. შემდეგ მარინი ტირანისადმი მოჩვენებითი მორჩილებით შევიდა წარმართულ ტაძარში და ლოცვის ძალით შემუსრა კერპები. ყოველივე ამას უცქერდნენ მარინის მშობლები, რომლებმაც საკუთარი პირმშო დიდსულოვნად უძღვნეს მსხვერპლად მაცხოვარს. წამების დასასრულ წმინდანს თავი მოჰკვეთეს. | 
