ღირსმოწამე ათანასე ბრესტელი ბელორუსი იყო. ის დაიბადა დაახლოებით 1597 წელს  ფილიპოვიჩების კეთილშობილ ქრისტიანულ ოჯახში. მან მიიღო სერიოზული განათლება - კარგად იცნობდა საღვთისმეტყველო და საისტორიო ლიტერატურას.

1627 წელს იგი აღიკვეცა ბერად. წმიდა ათანასე უფლის დედის განსაკუთრებული კურთხევით თავდადებით იცავდა მართლმადიდებლობას „რეჩ პოსპოლიტას“ მიერ მიტაცებულ მიწებზე. მან გადაიტანა არაერთი შეჭირვება და უკანონო სასჯელი უნიატებისაგან - სამგზის იყო დატუსაღებული. წმინდანი ხელისუფალთაგან მივლინებულ იქნა კიევში, რათა წარმდგარიყო სასულიერო სასამართლოს წინაშე, მაგრამ გამართლებულ იქნა და დააბრუნეს თავის ტაძარში. მტრული გარემოცვის პირობებში ათი  წელი იბრძოდა წმიდა ათანასე მართლმადიდებლობისათვის, რომლის მიმართ ერთგულება დაამტკიცა  განსაცდელებისა და ტანჯვის გადატანით.

მას კიდევ მოუწყეს სასამართლო, რომლის განჩინებითაც უნიის დაწყევლისათვის მიუსაჯეს სიკვდილი.  წმიდა ათანასე მოწამებრივად აღესრულა 1648 წელს (წმიდა ნაწილთა აღმოყვანება მოხდა 1679 წლის 20 ივლისს).